Спатканне распачалося адарацыяй Найсвяцейшага Сакраманту, якое правёў а. Віталій Чабатар, кларэтын. Дапамагалі яму, канешне ж міністранты, якія не толькі выконвалі свае непасрэдныя абавязкі, але таксама прамаўлялі адмысловыя разважанні.
Пасля адбылася св. Імша, якую ўзначаліў кс. Павел Беразун, вікарый магілёўскай катэдры. Гамілію прамовіў кс. Андрэй з Горацкай парафіі, у якой была разважана неабходнасць малітвы ў жыцці міністранта. “Можна сказаць, што міністрант настолькі з’яўляецца сапраўдным, “жывым” паслугачом, паколькі ён развівае сваё духоўнае жыццё, а перад усім размову з Госпадам – малітву” – зазначыў святар.
Пасля святой Імшы кожны міністрант атрымаў невялікі святочны падарунак на Божае Нараджэнне.
Наступным пунктам фармацыйнай сустрэчы стала гарбата з пачастункам, а пасля адбыўся супольны прагляд фільму ў кінатэатры.
Шчыра дзякуем усім, хто прыняў удзел у сустрэчы!
