Адарацыя Найсвяцейшага Сакрамэнту і споведзь сталі момантамі падрыхтоўкі да святой Імшы. Гэтай часткай сустрэчы кіраваў духоўны айцец Магілёўскага рэгіёну кс. Андрэй Далянскі.
У гаміліі падчас святой Імшы Мітрапаліт Тадэвуш звярнуў увагу на тое, што, «дзякуючы святарскай паслузе Езус сваёй ласкай нараджаецца ў нашых душах, прыходзіць да нас у Божым слове, сакрамэнтах, асабліва Эўхарыстыі, і іншай дзейнасці Касцёла». Арцыбіскуп запрапанаваў таксама паразважаць над пытаннем: «Калі б сучасны чалавек апынуўся на месцы нараджэння Езуса, то як ён успрымаў бы ўсё тое, што там сталася? Ці ён мог бы ў гомане сучаснага свету пачуць голас анёла, які абвяшчае Нараджэнне Збаўцы?»
«Нашым, святароў, заданнем з’яўляецца дапамагчы яму пачуць голас анёла, які і сёння абвяшчае Нараджэнне Збаўцы, а таксама дапамагчы ўбачыць Яго. Нам неабходна абудзіць спячага чалавека і сказаць яму: “Уставай, паглядзі, пасля доўгіх пакаленняў пераследу над нашай зямлёй ізноў засвяціла Бэтлеемская зорка”», — падкрэсліў іерарх.
Потым удзельнікі сустрэчы падзяліліся аплаткай і выказалі адзін аднаму віншаванні.
Падчас сумеснага пачастунку былі абмерваканы некаторыя пытанні, звязаныя з функцыянаваннем дэканатаў.
Кс. Арцыбіскуп заахвоціў арганізоўваць парафіяльныя пілігрымкі да “Брамаў Міласэрнасці”, каб скарыстацца з тых дароў, якія нясе ў сабе Год Міласэрнасці.
Мітрапаліт Мінска-Магілёўскі распавёў аб хваробе адной з манаскіх сясцёр, якая працуе ў Беларусі і заахвоціў быць салідарнымі па меры сваіх магчымасцяў.
Пасля арцыбіскуп Тадэвуш перадаў заўвагі кс. Дзмітрыя Барылы адносна працы Касцёльнага Суда, а таксама прыпомніў нормы касцёльнага права адносна рэзідэнцыі душпастыраў.
Удзельнікі сустрэчы атрымалі запрашэнне на святкаванне дня нараджэння ардынарыя, якое адбудзецца 2 студзеня 2016г.
Затым да прысутных звярнуўся біскуп Аляксандр Яшэўскі, які прыпомніў аб тым, што 23.01.2016г. у Магілёве адбудзецца экуменічная малітва, а таксама што 25 студзеня прыпадае 2-ая гадавіна біскупскага пасвячэння біскупа Юрыя Касабуцкага. Як зазначыў біскуп Аляксандр, кананічная візітацыя парафій у Магілёўскім дэканаце плануецца ў лютым 2016г.
Было вырашана, што наступнае пастырскае спатканне духавенства Магілёўшчыны адбудзецца 20.01.2016г. у парафіі Маці Божай Бялыніцкай г. Горкі.
View the embedded image gallery online at:
https://mohylev-katolik.by/index.php/item/291-pastyrskae-spatkanne-z-mitrapalitam-tadevusham-adbylosya-magiljove#sigProGalleriaa212c83433
